Rev 18 | BOJ | STEP | Onaqa e laŋ aŋgro bei laŋ qure uratosiq mandamq aieqnaq unem. Laŋ aŋgro di tulaŋ siŋgila koba. Aqa qasaŋ na walaej dena mandam kalil suwaŋekritej.

Revelation of John 18

Babilon qure kobaquja a tulaŋ padalougetej

1 Onaqa e laŋ aŋgro bei laŋ qure uratosiq mandamq aieqnaq unem. Laŋ aŋgro di tulaŋ siŋgila koba. Aqa qasaŋ na walaej dena mandam kalil suwaŋekritej. 2 Onaqa a tulaŋ koba leleŋosiqa endegsi marej, “Babilon qure kobaquja a tulaŋ padalougetqo! Od, a tulaŋ padalougetqo! Babilon qure di mondor uge uge kalil naŋgo so sawa. Mondor uge naŋgi ti qebari jigat naŋgi ti qebari uge kalil dego qure dia unub. 3 Tamo uŋgasari sawa sawa kalilq di unub qaji naŋgi Babilon ombla na sambalaoqnsib laqneb. Naŋgo kumbra uge di naŋgi wain siŋgila koba uyoqnsib nanarioqneb dego bul. Mandor kokba mandamq di unub qaji naŋgi dego Babilon ombla na sambala-oqnsib laqneb. Silali qa wauo qaji tamo naŋgi silali qa wauoqnsib Babilon aqa kumbra uge uge dena silali koba oqneb. Babilon a kumbra tulaŋ ugedamu yoqnej a deqa jemaiyosaioqnej.”

4 Onaqa laŋ goge dia Qotei a tulaŋ koba maonaqa e aqa kakoro quem. A endegsi marej, “O ijo segi tamo uŋgasari, niŋgi Babilon qure di uratosib boiye. Une kalil a yeqnu qaji di niŋgi a dauryosib yo uge. Aqa une deqa a awai uge oqas. Niŋgi a beteryosib awai uge di o uge. 5 Babilon aqa une kalil di tumbolosiq oqsiq laŋ qure ojqoqa e unonum. Kumbra uge kalil a yoqnej qaji Qotei a deqa are walyosaieqnu. 6 Kumbra uge kalil sambala uŋa a yeqnu qaji niŋgi deqa are qalsibqa a kamba qaliye. A kumbra uge yoqnsiqa olo di buŋyoqnsiqa kumbra tulaŋ ugedamu yeqnu. Dego kere niŋgi aqa kumbra uge kalil deqa olo keretosib a kamba qaliye. A wain siŋgila koba gambaŋq di qamsiq bulyeqnu. Deqa niŋgi olo wain tulaŋ siŋgila koba bulyosib a kamba anaiyiye. 7 A na aqa segi ñam soqtoqnsiqa sambalaosiq laqnsiqa kumbra uge uge yeqnu. Niŋgi aqa kumbra deqa keretosib a jaqatiŋ koba yibqa a akamugetqas. A segi mareqnu, ‘E mandor koba. E ijo segi awo jaram kobaq di awejunum. E uŋa qobul sai. Gulube bei ijoq bqa keresai. Deqa e akamqasai.’ 8 A degsi mareqnu deqa bati qujai qa gulube tulaŋ uge uge aqaq aieleŋqas. Osim a makobaiyosim akamugetqas. Osim mam koba osim aqa jejamu ŋamyuo na yugwas. Babilon aqa kumbra tulaŋ ugedamu deqa Qotei na aqa une kalil qa pegiyosim a tulaŋ padaltougetqas. Qotei a segi Qotei koba. A siŋgila koba ti unu. Siŋgila dena a na Babilon qure tulaŋ padaltougetqas.

9 “Mandor kokba mandamq di unub qaji naŋgi Babilon ombla na sambalaosib laqnsibqa kumbra tulaŋ ugedamu yeleŋoqneb. Deqa Babilon qure a ŋamyuo na yusim qurem oqoqnimqa mandor kokba naŋgi di unsibqa akamaniyosib tulaŋ are gulubeinjrqas. 10 Naŋgi Babilon aqa jaqatiŋ koba di unsibqa tulaŋ ulaugetqab. Osib isaq di tigelesosib maroqnqab, ‘O Babilon, ni qure kobaquja! Ni nami qure siŋgila koba soqnem! Ariya bini ni tulaŋ padalougetonum! Bati qujai qa ino kumbra uge aqa awai agi ni itonum!’

11 “Silali qa wauo tamo sawa sawa kalilq di unub qaji naŋgi Babilon aqa jaqatiŋ deqa are qalsibqa naŋgi akamaniyoqnsibqa are tulaŋ gulubeinjroqnqas. Di kiyaqa? Tamo qudei naŋgi olo naŋgo iŋgi iŋgi awaiyoqnqasai. 12 Naŋgo iŋgi iŋgi agi gol, silva, meniŋ boledamu, kolilei tulaŋ boledamu, gara qat naimyo, gara lent utru segi segi, gara yauŋo pirqaqo. Naŋgo ñoro qudei agi ŋamtaŋ quleqt bole bole, iŋgi iŋgi elefan aqa qalagei na gereiyo qaji, iŋgi iŋgi ŋamtaŋ boledamu na gereiyeleŋo qaji, iŋgi iŋgi bras na gereiyo qaji, iŋgi iŋgi ain na gereiyo qaji, iŋgi iŋgi meniŋ naimyo na gereiyo qaji. 13 Naŋgo iŋgi iŋgi qudei agi meiwo, lei uyo qaji, sum koitib quleq oqwajqa, namur quleqt, goreŋ quleqt, wain, goreŋ goio qaji, bemsum, wit. Naŋgo ñoro qudei agi bulmakau, kaja, hos roŋgom ti, kaŋgal tamo naŋgo jejamu ti naŋgo qunuŋ ti. Iŋgi iŋgi kalil deqaji tamo qudei naŋgi olo bunu awaiyoqnqasai. 14 Deqa silali qa wauo qaji tamo naŋgi na Babilon endegsib minjoqnqab, ‘Iŋgi iŋgi kalil ni na eleŋqajqa are prugmoqnej qaji agi ni uratmosib koboonub. Ñoro bole bole kalil silali kobaquja na gereiyeb qaji de ti ino segi wala bole bole ti agi koboonub. Deqa iŋgi iŋgi kalil deqaji ni olo bunu unqasai.’

15 “Silali qa wauo qaji tamo naŋgi na iŋgi iŋgi deqaji gargekoba qariŋyeqnabqa Babilon na awaiyoqnsiqa silali tulaŋ koba enjroqnej. Aqa kumbra dena bunuqna a jaqatiŋkobaiyqas. Yimqa silali qa wauo qaji tamo naŋgi di unsibqa naŋgi tulaŋ ulaugetosib isaq di tigelesosibqa akamaniyoqnsib are tulaŋ gulubeinjroqnqas. 16 Osib endegsib Babilon minjoqnqab, ‘O qure koba Babilon, ni tulaŋ padalougetonum! Nami ni gara qat tulaŋ naimyo na kabuoqnsimqa gara lent utru segi segi jugoqnsimqa ino jejamu gol na ti meniŋ boledamu na ti kolilei boledamu na ti walatoqnsim soqnem. 17 Deqa bati qujai qa ino silali ti wala ti kalil agi saiekritonub.’ Naŋgi degsib Babilon minjoqnqab.

“Qobuŋ ojo tamo kalil naŋgi ti tamo qobuŋ na sawa sawaq di laqnub qaji naŋgi ti tamo qobuŋq di waueqnub qaji naŋgi ti tamo yuwalq dena silali eqnub qaji naŋgi dego Babilon qure koqyosibqa isaq di tigelesqab. 18 Tigelesosib ŋamyuo na a yuim qurem oqoqnimqa di unsibqa tulaŋ koba leleŋoqnsib maroqnqab, ‘Qure endi tulaŋ kobaquja. Qure bei qure ende ti keresai. Sai bolesai!’ 19 Naŋgi degsib maroqnsibqa wi sum oqnsib naŋgo gateq di atoqnsibqa akamaniyoqnsibqa are tulaŋ gulubeinjroqnqas. Osib tulaŋ koba leleŋoqnsib endegsib Babilon minjoqnqab, ‘O Babilon koba, ni tulaŋ padalougetonum! Qobuŋ taqato tamo yuwalq di laqnub qaji naŋgi inoq dena silali tulaŋ koba oqneb. Deqa naŋgi ino jaqatiŋ di unsibqa naŋgi are tulaŋ gulube-injroqnqas. O aiyo! Bati qujai qa ni torei padalougetonum!’

20 “O laŋ qure ti Qotei aqa segi tamo uŋgasari niŋgi ti tamo kalil Yesus na aqa anjam mare mare laqajqa qariŋgej qaji niŋgi ti Qotei aqa medabu o qaji tamo ti niŋgi kalil Babilon qure tulaŋ padalougetqo di unsibqa tulaŋ areboleboleiŋgeme. Babilon aqa kumbra uge uge kalil Qotei na unekritsiqa deqa keretsiq awai uge yqo. Kumbra uge kalil Babilon na niŋgi eŋgoqnej qaji di Qotei na kamba kumbra uge yqo.”

21 Ariya anjam di koboonaqa laŋ aŋgro siŋgila koba bei a bosiqa wit kuroyo qaji meniŋ kobaquja osiq soqtosiqa yuwalq di waiyej. Osiqa marej, “Qotei na degsim Babilon qure koba siŋgila na waiyim koboqas. Yim tamo qudei naŋgi na olo bunu a unqasai. 22 O Babilon qure, nami tamo naŋgi inoq di gombiŋ ti yumba ti gul ti anjamoqneb. Ariya bunuqna inoq di olo anjamqasai. Deqa tamo naŋgi olo quoqnqasai. Maŋwa tamo naŋgi dego olo bunu inoq di sqasai. Wit kuroyibqa inoq di olo anjam atim quqwasai. 23 Lam inoq di olo puloŋqasai. Inoq di tamo bei na olo uŋa baŋ ojqasai. Uŋa na tamo baŋ ojqasai. Deqa naŋgo aiyel anjam inoq di bunu quqwasai. Nami ino silali qa wauo qaji tamo naŋgi tamo kokba soqneb. Ariya bini naŋgi koboonub. O Babilon, ni na gumaniŋ kumbra gargekoba yoqnem. Kumbra dena ni na tamo uŋgasari sawa sawa kalilq di unub qaji naŋgi gisa gisaŋnjroqnem.”

24 Babilon qure a na Qotei aqa medabu o qaji tamo naŋgi ti Qotei aqa segi tamo uŋgasari naŋgi ti ñumeqnaq moreŋoqneb. Aqa une di aqa jejamuq di sonaqa Qotei a unqo. Tamo kalil jeu tamo naŋgi na mandamq endia ñumeqnab moreŋoqneb qaji naŋgo leŋ ainaq Qotei a di unsiqa agi Babilon aqa jejamuq di atqo.